ثورة 25 يناير

اعترف

اني لا املك الحد الادني من الثقافة السياسية

وعمري  في حياتي ما مشيت في مظاهرة

 ولا فكرت حتي

وبالطبع لا انتمي لاي حزب سياسي

..........................................

يوم 24 يناير

كانت فاتيما بتقولي ان مصر بعد 25 يناير

عمرها ما هتبقي زي  مصر قبل 25 يناير

واننا هنبقي حاجة كدا زي ثورة تونس واكتر

بس انا كنت بقولها

انها متفائلة زيادة عن اللزوم

مش للدرجة دي يعني

يوم 25 بليل

اتحمست جدا

وحسيت ان في حاجة جديدة فعلا جاية

 كتبت علي الماسنجر بتاعي يوم 25 بليل

وعلي  غرار ثورة تونس نجت الثورة المصرية في اسقاط نظام متعفن استمر في الحكام لمدة 3 عقود

وكنت حاسة اوووووووووووووي ان دا هيحصل

كنت ممتحمسة جدا فعلا

وكنت براهن علي ان مبارك هيتنحي

كنت عايزه بجد اشارك في المظاهرات

لكن لجنة القيادة المنزلية في بيتنا رفضت رفض نهائي

وقمعتني

والغت حقي في التظاهر السلمي

اقول ان التاريخ هيشهد علينا
ولازم نلاقي حاجة نقولها لولادنا
لكن لا تاثير

هذا قمع بموحب الخوف عليا

اكتر حتي من خوفي انا علي نفسي

كلنا في البيت 

 تبعنا الاخبار والاحداث وكنا مبنحولش من علي القنوات الاخبارية

 ودا حدث  عمري  ما حصل في بيتنا طبعا

 قال منحولش من علي القنوات الاخبارية قال

وعشت في اجازة من الشغل لمدة اسبوع كامل

قضيتها في البيت كلها

:(

مبعملش  حاجة في حياتي غير اني بتابع الاخبار

..........................................

لبست علم مصر

وقعدت اتظاهر في بيتنا بقي

مهو مفيش امل في تغير قناعات لجنة القيادة المنزلية بتاعتنا 

مكالمات كتير بيني وبين اصحابي

ممن  يراقبون الحدث وممن يشاركون

محمد يحيي

من غير تفاصيل

هو شاركني 

ودعمني 

وانا بقوله

شكرا اد الدنيا

محمد اخويا
قالي انه رايح المظاهرات وانا طبعا شجعته 
رغم  ان محمد كان بيقول ماله جمال مبارك يعني لما يبقي رئيس الجمهورية بعد باباه
دا حتي ابن الريس هيبقي فاهم
لما نزل المظاهرات مع اصحابة ورجع
بقي بيتكلم علي جمال وحسني واتابعهم 
باداء مثقف راقي فاهم
رغم ان دا مش  اداءه
قولت دي عدوي الثورة بقي
وبليل كان بينزل قدام البيت مع كل شباب الشارع وميطلعوش غير تاني يوم الصبح
اخلاق الرجاله دي بقي رغم انها جزء  لا  يتجزء من شخصية محمد
لكن كلنا كنا فرحانين بيه بزيادة
محمد
عبر المدونات الالكترونية بقولك
اني بحبك يا اخويا الحلو 99.9%

سهير

عايزه اقولها كلااااااااااااااام كتير

فرقتي كتير معايا

هي

متابعة جيدة للقنوات الاخبارية والبرامج السياسية

من يوم 25 وهي معايا علي التليفون

وكل ما يحصل حاجة تكلمني

وتتناقش معايا فيها

وتقولي احساسها القانوني بيها

مهي البنوتة بتدرس حقوق بعد ما خلصت تجارة

ولا يمكن الاستهانة بحسها القانوني برضو

شكرا اد احلي احساس في  مصر الجديدة يا سوستي 

منة

كانت طبعا متحمسة جدا ونزلت يوم 25 

وقعدت تحكيلي علي الموقف الجلل اللي كانت فيه

وطبعا الفيس بوك بتاعها كان ساخن جدا

وعلي غير العادة شدت معايا في  نقاش حول الثورة كدا اختلافنا فيه

هو انا اه اضايقت

 بس دا فرق معايا بالايجاب

ولما غيرت رائي كلمتها

وقولتلها شكرا

وطبعا منه كانت من الناس اللي شجعوني انزل واشارك

وافكني من لجنة القيادة المنزلية

منة بحبك  وشكرا اد الدنيا يا منون

فاتيما

من البداية للنهاية

رافيقة

مترفقة

مقدرة لمشاعري

مشاركة بكل احساس جميل

مشاركة بحوارات لا اريد افتقدها

جديا مش اعرفه اقول ايه

بس انتي من اكتر الناس اللي فرقت معايا

بس واللهي مش بجملك

ومش هجملك

صفاء

شريكة النصر

متنفعيش تبقي حاجة غير كدا

لازم البديات معاكي يبقي ليها  نهايات مختلفة

بيكي فرحتي بتبقي اميز 

مشاركاتي بتبقي ليها احساس مختلف في قلبي

بحبك اخر 25 حاجة يا براوني

سلمي

مامي العسولة

العاقلة

اللي بتتطمن علي اولادها

وبتوجهم بشكل منطقي فريد

اد 2/2 بحبك

 ولاء

شريكة التزويخ

والمشاركة المتحمسة دوما

بجد يا لولي انتي حد جامد تحرير

سارة - نورهان -رحاب

واللهي من غيركم مش  عارفه كنت هاثرعلي ماما ازاي

ربنا يخليكوا ليا

استمتعت بيكم ومعاكم اخر حاجة

وناس كتير فرقت معايا 

حوار وائل غنيم المميز

الرموز اللي كانت كلها بتشجع الثورة

مروة مدحت اللي لو متقبلناش بتبقي الغايب الحاضر 

يارا مش  عارفه ليه كنت حاسه انها شبهي بزيادة

ناس ع الفيس  بوك 

رحاب - اسيا سليم - ريهام جاد

وعلي المدونات

جبهة التهييس الشعبية  مش عارفة....بس نفسي اعرف  عنبر العقلاء عمرو سلامة Amr Salama 

وناس تانية كتير

..........................................

في حاجة المفروض اعترف بيها بقي

ان بعد  خطاب  مبارك يوم الثلاثاء

ولاني انعزلت عن النت

خدعني الاعلام

ومعذورين كل الناس اللي بياخدوا الاخبار من مصادر واحد بجد

تخيلوا حد قاعد يتفرج مثلا بس علي التلفزيون المصري

هيبقي ايه احساسة بالثورة مثلا

المهم

خدعني الاعلام

_مهم وقعونا الجزيرة

بعيدا عن تحفظاتي علي ادائها_

اه

كنت فخورة جدا بالثورة

ولكن

قولت دعونا نتحاور معهم

متسائلة

لماذا يرفضون الحوار

مقعدتش كتير في الحالة دي 

بعدها

حصلت احداث الحصان والجمل الشهيرة

ونقاشي مع فاتيما فرق معايا جدا

وصورة جريدة المصري اليوم

لما شوفتها

مكنش في بالي اي حاجة 

غير سؤال

هما ليه قتالوهم؟

تمنيت ان تكون الثورة 

ثورة بلا  شهداء

بلا عنف من الامن 

وللاسف دا كان مستحيل في ظل النطام السابق

..........................................

وقررت انا

التزويخ من

 لجنة القيادة المنزلية

والذهاب الي  المظاهرات

لان

 مينفعش

 ادخل في حوار وفي النهاية

 اسيبها قلقانة عليا اكتر من قلقلي انا علي  نفسي  اصلا

وفي ميدان التحرير

اه من التحرير 

نبداء بكلام سهير

_

عندما تمشى الى ميدان التحرير يمتلكك احساس لا يمكن وصفه

فتارة تشعر بالفرح الشديد

و تارة تشعر بالعزة وتارة بالكرامة

ستجد فى كل خطوة خليط من المشاعر النبيلة

اذهبوا جميعا الى هناك لنستعيد بلدنا وحريتنا وكرامتنا وعزتنا ونثبت للشهداء الشرفاء اننا حملنا الامانة من بعدهم

_

وعندما ذهبت لميدان التحرير

لم اشعر اني اضافت شيء لثورة 25

بقدر ما اضافت لنفسي

اضافت لسالي الكثير

الكتير من الثقة بالنفس

احساس رائع بفخر بأني مصرية

باني اتمني لهذه البلد

تشعر بالثقة في كل من حولك

تبقي بتسال نفسك

الناس دي جاية منين

مهو اكيد مكنوش كلوهم بره ورجعوا فاجاة مثلا

تبقي  متباهي بكل شخص جنبك

  ومطمن  مع كل اللي حواليك

تبقي عايز تقول انا مصري بأعلي صوت

بس

عشان تقول انا وقفت وسط شباب 25 يناير

تهتف باعلي صوت عندك

وانت حاسس انك واقف في بيتك بجد

مش انك واقف في  الشارع

تبقي حاسس ان ميدان التحرير دا بيتك بجد

تبقي  حاسس انك هتسيب  مصر

 وتطلع براه

لما تسيب ميدان التحرير

وابقي

ظغطي واطي

 ومصدعة طبعا

مكتئبة اكيد

ونومي مش متظبط وكله احلام كلها عنف وقتل ورصاص ودم

كل هذا لا يساوي الكثير

فقلبي ينبض حب ويهتف تشجيع واحترام وتقدير

 لكل مصري 

اعطيني الفخر بمصريتي 

فقط لانه يدعم ويفخر بشباب التحرير

..........................................

ولما ترجع من هناك

مشحون بطاقة من الهتافات

تستغرب من اشخاص 

لما يختلفوا من هتافاتك

فاكره لما كتبت

‎!ارحل يعني امشي ياللي مبتفهمش فقط لغرض مشكوك فى براءته

بعد ما قريت

مشكلة أنهم لا يريدون ان يفهموا

فحد علق يقول

وهل فى دينك مايدععوكى أن تسبى حاكم البلاد طالما لم يشرك أو يحسكم على الشرك ، مهما قد فعل فهو بشر ويكفينا التعبير باحترام ودون سب ، ولعلمك انا من معارضيه وكنت احد المشاركين فى التغيير لمدة يومين

وبعدين هو شارك فى تحرير سينا وكان قيادى انتى عملتى ايه بقى

سورى لو الكلام جارح

فقولتله

لاءه الكلام مش جارح ولا حاجة

..

بس

انامشتمتوش

..

دا تحليل الموقف

انا بطالب بحق بيطالب بيه اكتر من 8 مليون مصري

وبقول لمبارك

"ارحل"

..

ولان انصار 25 بيقولها من يوم 25/1 ليومنا هذا

وهو قاعد يدور حولها في مراوغة اعتقد انك عارف ابعادها

فبترجمها له بالعامية

وبقوله

"امشي"

..

ولانه من يوم 25 لوقتنا هذا برضو

الناس بترجمهه له ب10000000000 بعد وبعد

وهو مش راضي يفهم

فبضم صوتي لصوت المفكر المسلم العظيم

فهمي هويدي

بقوله

ان الغرض مشكوك في برائه

ودا لان كل ملبسات الموقف مبتودناش غير لكدا

.....

؟!هل في هذا قله احترام مني يا محمد

..

اما عن انجازاتي الشخصية

فانا لم ارتقي لمنصبة السياسي "العام"

ليحاسبني الشعب عليها

هو في موضع مساله بواقع منصبة العام يا فندم

وحتي تحرير سينا كان من واجبات منصبه العام برضو

,,

ومحاربة الفقر والجهل والبطالة والفساد

من واجباته العامة برضو

ومسئولية ان يعيش الشعب في حرية وامان وعدالة اجتماعية

من مسئولياته العامة برضو

ان لا اتحدث عن حسني مبارك المواطن

وانما عنه كرئيس جمهورية مصر العربية منذ 3 عقود

وسيقف التاريخ ليقيس حجم انجازته مقارنة بمدة رئاستة

فهل في هذا قلة احترام؟

فعلا مكنش في قصه اننا نبقي مختلفين

لكن

ليه

وازاي؟!

..........................................

اما عن يوم 11/2/2011

فاليوم كان تاريخي

مش بس في تاريخ مصر

لكن في تاريخ الاسرة المجيدة

 ,, انا نزلت التحرير ,,

علنا وليس في السر .. علنا وبأذن ماما

"ياسلام"

ورجعت

سعيدة اوي اكتر حاجة

مكنتش متخيلة اني ابقي سعيدة للدرجة دي

حضرت الاحتفال التاريخي في التحرير وهتافنا بأعلي صوت

 "انا رافع راسي فوق انا المصري"

حسيت كل الاغاني الوطنية اللي اتغنت كل كلمة وكل حرف ولمس قلبي

 كل معني كنت بقول عليه مش اوي وبقي اقل من احاسسنا بالموقف

فخورة اني مصرية كما لم اكن من قبل

مبروك يا كل اهل مصر ويا كل العرب

واحنا راجعين من التحرير ركبت ميكروباص 

لاقينا الناس جواه بتغني وبتهتف ومطلعه الاعلام من بره الشباك ..

وكل ما نعدي علي حد في الشارع يزمر لنا

كنا ماشين بجد في فرح

كل الناس بتبص علينا

و يقولنا مبروك

ويهتفوا معانا ..

كل الناس كانت بتقول من جوة قلبها

"انا رافع راسي فوق انا المصري"

انا اتغيرت

بجد

مش قصة اني فهمت كلمات قراتها في كتب التاريخ زمان ومفهمتش معناها غير في احداث 25 يناير

انا فعلا اتغيرت 
درجة انتماء .. ثقة .. اهداف .. وحاجات تانية كتير

انا متفائلة

وواثقة ان ايامنا الجاية هتبقي الاحلي

ربنا يحميها مصر 

واثقة ان  هيبقي عندنا ناس 
زي الراجل دا واحسن كمان

..........................................

دي من وجهة نظري اجمل اغنية

اتعملت لتورة 25 يناير

هي اه اغنية تخليك تبكي

بس كمان تخليك تقول

اللهم اغفر لهم وارحمهم

واكتبهم من الشهداء

واجعلهم ممن صداقوك النية وصادقتهم الاجابة

يارب اجمعنا بهم علي باب الجنة

اللهم لا تحرمنا اجرهم ولا تفتنا بعدهم

واللهم اغمر اهليهم برحمتك

واعفيهم اعفو عنهم

 يا ارحم الارحمين