وهم الكتب الأكثر مبيعا



العادي ان رف الكتب الاكتر مبيعا بيبقي في ابرز موقع في اي مكتبة..
 في الفاترينة لو في ..  في المدخل  ..  عند الكاشير
ورغم كدا الرف دا عمره ما كان ملفت بالنسبة لي ..
ديما عندي قناعة ان مش عشان الكتاب موجود في الرف دا يبقي كتاب مميز او العكس..

في الغالب
 بسأل الناس اللي بقتنع بذوقها في الفراءة .. 
او بيبقي في موضوع جاذبني فبشوف الكتب اللي عليه..

.............................................................

من الكتب الاكثر مبيعا اللي قرائتها
رواية الفيل الأزرق لاحمد مراد
كذا حد من اصحابي قالي فيها شعر
وان النهاية حكاية..
 محمد جوزي برضو قالي ان الكتاب حلو ونهاية غير متوقعة ..

انا بقي طول ما انا بقرأ الكتاب مستنية الحته الحلوة
وقاعدة اصبر نفسي واقول اكيد زمانها جاية   
لحد ما وصلت للفصل الاخير .. وقولت هي هنا ..ايوه  النهاية اللي بيقولوا انها غير

وخلصت الرواية الحمد لله .. 
وابدا مستمتعتش بيها!!
تحس كدا انك قاعد في خمارة طول الرواية ..
 ومش دي القصة
الوصف والروابط تحس ان فيها حاجة غلط كدا.. 
اسلوبة مبالغ فيه .. بالنسبالي بصراحة..

ورغم كدا دخلت الفيلم لما نزل ..
كان بالنسبة لي اول رواية اقرائها الاول وبعد كدا ينزل منها الفيلم .. مش العكس
فكنت عايزه اعيش الجو
كنت قريت الرواية من فتره طويلة .. ومكنتش فاكرها بالنص يعني

الفيلم طبعا احسن بكتير من الرواية .. القصة متحرفه شوية .. 
والفيلم مصروف عليه .. متصور حلو .. الصوت والموسيقي برضو حلوين اوووي
بس برضو ممل .. في حته واقعة .. في روابط مش مظبوطة .. تحسه صعب يتصدق .. بيفصل كدا!!

.............................

من الكتب الاكتر مبيعا برضو اللي قراتها
رواية ربع جرام لعصام يوسف
الرواية من 2008 .. بس انا قراتها الشهر دا
بجد تحفة ..
ورغم ان الرواية كبيرة .. بس انا خلصتها في 3 ايام من كتر ما كنت مشدوده لها..
ورغم انها بتتكلم عن المخدرات وانواع كتير منها .. لكنها رواية فعلا محترمة
قعدت كتير عقبال ما فهمت ايه اهمية الليمون في حوار البوادرة والضرب؟!
 بس الحمد لله اخيرا وصلت
الرواية بتفهمك حاجات كتير صعب اووي تفهمها وانت بره الصورة .. صعب تحسها بالشكل دا
..
لما خلصت الرواية كان عندي احساسين
الاول اني عايزه اولادي يقروها ..اما يبقي عندي اولاد اصلا..
التاني اني عايزة  احضر لقاء لصلاح بطل الرواية .. 
ويقعد يتكلم كدا وكلنا نعقد نصقف له جاااااااااامد بقي .. والجو دا..
لما عصام يوسف في اخر الرواية قعد يقول اننا لازم نحترم خصوصية ابطال الرواية
كنت حاسة انها جت في الوقت الصح .. 

........................................

الكتب الاكتر مبيعا .. بالنسبة لي وهم .. واسلوب تسويقيي .. ينجح للاسف مع كثيرون!!

حكاياتي بين رفيعة وتخينة



انا طولي 164 سم

ولحد ما وصلت ل 22 سنة ..
 وانا وزني لم يزيد ولا مره عن ال 50 كيلو!!
في الغالب كنت بين ال 48 : 50 ..

سمعت طبعا كلمات لطيفة كتير بسبب القصة دي زي..
انتي ازاي رفيعة كدا!!
عصاية .. ممكن
ممكن حد لطيف يقولي .. انتي مبتكليش يا بنتي وله ايه؟!
...  يعني كلمات راقية جدا ولطيفة من هذا المنوال!!!

العجيب بقي .. 
اني كنت عارفة اني رفيعة فعلا ..  
بس الكلام دا فعلا مكنش بيفرق معايا!!

 ..في ديسمبر 2009 بقي قررت اني اتخن!!
كان بالنسبة لي اني اوصل 60 كيلو .. 
هدف من اهداف السنة الجديدة..
تحدي محترم يعني ..

ساعتها كانت عاداتي الغذائية  فعلا غلط
 كنت باكل وجبتين مش تلاثة
 مش بفطر 
ساعات اصدع كدا علي الساعة 10 بليل فافتكر اني مفطرتش!!
مبحسش بالجوع  كتير اصلا
+ ان تحليلي كلها سليمة ومعنديش حاجة "الحمد لله"
الفكرة بس اني مش بأكل كتير..
 الاستثناء طبعا كان الشيكولاتة هي ديما بالنسبة لي شيء لايقاوم..

 
وصلت من 50 : 60 في شهرين ونص
لا ومش كدا بس.. 
 انا مكنتش راضية عن وزني لما وصلت ال 60
كنت حاسة اني ممكن اتخن شوية كمان!!
فجبت 63..  ابديت احس اني كويسة ساعتها .. 
بس كنت بقيت باكل بكميات اكتر كتير جدا من اللي كنت متعوده عليها
ففضلت ازيد .. ووصلت لل 65
وهنا stop
حسيت بقي اني تخنت وان كدا كتير ..
ورجعت لل 63 .. وثبت علي كدا .. 
وابتديت اكل عادي
وعاداتي الغذائية اختلفت كتير للاحسن
 
 كنت باكل بالوقت
بفطر .. اتغدي .. اتعشاء .. 3 وجبات اساسي
باكل سناكس بين الوجبات..
مفيش حاجة اسمها شبعت .. في حاجة اسمها خلصت الطبق .. غير كدا لا!!
لان شبعت دي معناها اني كلت اللي يشبعني مش اللي يخليني ازيد في الوزن..
من الحاجات المضحكة اني كنت ضربة لتر سفن-اب في شنطتي بضربه كل يوم.. عادي كدا!!

الحوار دا كدا كله علي بعضة خدلة 3 شهور!!
ومن غير ما اتابع عند دكتور تغذية حتي!!

تحقيق وزن ال 63 كيلو فضل ليا حافر في حاجات كتير جدا
كنت حاسه ان التخن دا من اصعب الحاجات اصلا.. 
اصعب من انك تعمل diet عشان تخس حتي!! ..
تحديات كتير جدا بجد .. ابسطها ان كل لبسي بقي في ال باي باي اصلا!!

وبس خلاص ..
فضلت عند وزن ال 63 مزدتش ولا نقصت من 2009 : 2013

طبعا بقي كل اللي عرفهم كانوا بيقولولي :
يا سالي هتتخني بعد الجواز.. كل الناس بيتخنوا!!
انا بقي برد بكل ثقة .. انا مش كل الناس .. انا سالي .. ومش هتخن :)

ونيجي بقي لمرحلة ما بعد الجواز
وتخنت شوية ..  احم .. مش اوي يعني بس بقيت 65 
الفرق مش حوار 
..cool..
ومفتكرش ان في حد لاحظ او علق يعني..

لحوار ما .. الدكتور طلب مني اني انزل من 65 :  58 كيلو
7 كيلو .. في شهرين ..  

جوزي قرر يستلمني بقي
سالي انتي تخينة علي فكرة وبتاكلي اكتر مني "بيهزر الولد" ..lol..
يجيب لنفسة شوكولاتة وميجبش ليا .. 
ويجي يقولي انا جبت شيكولاته ليا انا بس عشان انتي تخينة "مش هنسالك الموقف دا عمري"
وطبعا معدتلوش الموقف يعني .. وبما اني كنت هعيط منه .. فالولد جب لي شكولاتة  كبيرة تاني يوم.. 
وانه يجيب لنفسه وميجبليش دا كان سخيف
وانه يجيبلي شوكولاتة وانا عاملة diet دا برضو كان سخيف
الفكره بقي في مقاومتي .. جدير بالذكر اني ماكلتهاش .. اكلتهاله تاني يوم وماكلتش منها ..
 "شطورة انا .. عاملة diet!"

العجيب بقي .. اني صدقت اني تخينة!!
العجيب اكتر .. اني كنت عارفة اني مش تخينة يعني.
. بس الكلام فعلا كان بيفرق معايا اوي!! ..
 كان فعلا بيضايقني.
كلمة تخينة دي فعلا كانت كلمة مستفزة جدا .. 
ومش بستوعب ان حد يقولهالي يعني!!
حتي الكلام الهزار من اي حد كان برضو بيضايقني!!
:(

 
وصلت من 65: 58 في 3 شهور من اخر فبراير لحد مايو 2014
يمكن عديت الشهرين بتوع الدكتور دول ..
 لاني جديا مكنتش عارفة في الاول اعمل ايه يعني؟!

طيب انا اصلا بحب افطر بال brown toast فخليتة مع جبنة light  بدل ما تبقي عادية!! ..
قللت السكر من 3 معالق ل معلقة .. وساعات بدون كمان!!
بطلت نسكافية علي الصبح بقالي 3 شهور ..ومش ناوية ارجع اشربة daily تاني..
باكل الزبادي light  ..  واصلا مش حاسه ان في فرق بينه وبين الزبادي العادي !!
بطلت اشرب بيبسي و صودا عموما .. بشربها استثناء بس ..
بكل سلطة اكتر ..  باكل في اطباق اصغر .. بشرب ميه اكتر
اما بروح اي مطعم بطلب عصير fresh مش Soda .. او مية
باكل كل اللي عايزه اكله بس بكميات اقل ..
 ومش باكل بعد الساعه 11 اي حاجة .. المفروض 8 بس دا مش هينفع مع نظام يومي.
وباكل شكولاتة اقل  ..
..

الحقيقي بقي ان تحقيق وزن ال 60 دا مكنش ليه فرحه مبهجة زي المره اللي قبلها .. 
مفيش مقارنة اصلا
مبسوطة طبعا اني وصلت لل 60 بس مش لدرجة اني حاسها انجاز زي المره اللي قبلها
يمكن لان دا هدف مش انا اللي فرضته علي نفسي بشكل كامل
ويمكن لان لو حد قالي في حوار عادي بعيدا عن قصه الدكتور دا مكنتش هقتنع اصلا !!
...

انا مفتكرش لنفسي ولو مره واحده اني علقت علي حد تخين مثلا
ودا فعلا مش بيفرق معايا خالص .. بحسها حرية شخصية يعني!!
الحكم علي الناس بجسمهم دا حكم اسخف مما يكون..

ممكن تقول كلام عادي جدا بالنسبة لك بس الكلام دا جديا يقلل ثقة اللي قدامك
 غياب التشجيع الايجابي في وجود diet سوء لحد بيخس او بيتخن حتي دا في حد ذاته محبط
الكلام السلبي سوء كان بهزار او بجد .. خصوصا لو لبنت يعني .. معتقدش انه مقبول
وحتي لو الطرف التاني بين لك انه مش فارق معاه .. هو فارق
اكيد اني اخس اصعب من اني اتخن ..
 انك تحرم نفسك من اكل قدامك وانت عايزه دا فعلا مش سهل _ربنا يرحمك يا بابا_

..
حاجة اخيره
الوزن المثالي 
هو الوزن اللي انت راضي فيه عن نفسك سوء اعلي او اقل من المثالي ..
واصلا مش مقتنعه ان في حاجة اسمها مثالي 
اي حد بيسعي عشان يعمل حاجة يحسن بيها نفسه ..
 ان شاء الله يكون بيخس او حتي بيتخن يستحق الاحترام والدعم..
..

الحمد لله

كورس اليوجا


من 13 سنة كدا .. يعني من وانا عندي 14 سنة كدا.. وانا فكرة اني عايزه العب يوجا .. وبتيجي كتيرعلي بالي..
معرفش ليه مخدتش خطوة جادة طول الوقت دا .. بس ممكن نضيف دا لجملة الحاجات اللي في حياتي اللي بشوفها مهمة بس عشان هي مش مستعجلة بتتاجل.. 


كان جنب مدرستي في وسط البلد "مركز مولانا ازاد الثقافى الهندى" ..ببابه الشيك:)
وفاكره اني رحت سالت فيه عن ازاي احجر وبتاع من يجي كدا 7 سنين!!

واخيرا لما قررت احجز كورس اليوجا .. كنت كل ما اتصل عشان احجز يبقي مفيش حجز شغال .. وقعدت في الحوار دا يجي شهرين ثلاته كدا عقبال ما احجز.. بس الجميل ان يوم عيد ميلادي السنة دي كان نفس يوم كورس اليوجا .. يوم عيد ميلادي اللي بيحمل الرقم المفضل ليا 7 .. ل 27 سنة ..




كورس اليوجا فعلا كان حدث ممتع .. من اول يوم في الحجز .. مرورا بكل تفصيل الكورس .. ووصولا حتي الي اخر يوم فيه..
اليوم اللي روحت احجز فيه اليوجا دا كان يوم مميز اوووي ..
اخيرا اتصلت وقالولي في حجز الاسبوع الجاي!! مكنتش مصدقة من الفرح!!
يوم الحجز نفسه كان يوم متالق جدا ..لان بعد كمية الاصدقاء اللي فكست ..
ايات شخصيا قررت تاخد معايا الكورس .. جديا دي كانت احلي حاجة في الكورس .. ايات ..الصحبة..

بعد ما حجزت الكورس كنت حاسه كدا بلحظة من لحظات الفرحة الفريدة اللي مش بحسها الا لما اعمل حاجة مميزة اوي
ودا نفس اليوم اللي ابتديت اقرا فيه "قواعد العشق الاربعون" ..كان مكس ممتميز جدا .. باخد كورس اليوجا.. وبتمشي في شوارع وسط البلد العريقة انا وايات.. بقرا رواية قواعد العشق الاربعون اللي بتتكلم عن الصوفية والتجرد والصداقة والحب  بطريقة مميزة وفريدة.. فعلا مكس فريد من الصعب انه يتكرر!!

...

اول يوم في الكورس كان حكاية ..اتفاجات اوي لما لاقيت ناس كبار في الستينات بيدربوا معانا ..ادوني طاقة مختلفة..
في اماكن كدا لما بتدخلها بتبفي عايز تتعرف علي كل الناس .. وتحس بالود من مجرد ابتسامات بعيدة.. هناك كان كدا..








التمارين نفسها كانت مفاجاة بالنسبة لي ..
 في حاجات كانت صعبة جدا.. معرفتش اعملها ..

 وفي حاجات تانية كانت بجد سهلة ..








وفي حاجات وانت بتعملها كدا تحس انك في صلاه فعلا.. 




لكن كل الحركات الاصعب والاسهل تحس فيها بانسجام مع نفسك.. وتحس فعلا انك بتهدا كدا..
لدرجة اني ساعات كنت بمجرد ما بخلص وانزل احس ان في دوشة رهيبة زيادة عن اللزم!!


...
وانا بتعمل النفس اليوجي العميق كنت حاسة احساس مركب جدا .. احساس مختلف .. اني جديا سامعه انفاسي .. مدرك اني بتتنفس.. جاسة بنعمة اني في العادي يعني مش بدرك دا .. رغم ان ادرك التنفس يعني في استرخاء بردو.. بس مينفعش تدرك دا طول الوقت يعني!!

...


ايات
وجودك كان بالنسبالي الحدث الاكتر تميزا ..التمشية بعد الكورس كانت اجمل ما في الكورس ..
 اجمل ما في الكورس.. لاني جديا كنت حساها جزء من الاسترخاء والتامل والتفلسف احيانا .. بحث داخل اروع المشاعر والذكريات.. مشاركة متميزة ومتالقة منك.. خلت مود الكورس نفسه من الصعب ان يتكرر!!
 
مش هنسي عبد الرحمن..  الولد الصغير اللي لما تهني سالناه علي الطريق .. الولد وصف الطريق بثقة تامة ..خلتني اشك فيه واقوله .. انت واثق وله بتفتي .. فرد كالرجال لا واثق!!

ومش هنشي لم الكوتش قال .. اني عندي دهون ومحتاجه اخس عشان يبقي عندي ليونة اكتر.. اول مره في عمري كله حد يقولي اني محتاجة اخس!!




بس الحقيقي اوي ان اليوجا مينفعش تبقي بداية .. لازم الواحد يكون اتدرب شوية قبلها مثلا..
وهو دا اللي انا قررت اعملة .. واتدرب تدريبات تعملي لياقة كدا شوية .. بعد كدا نرجع تاني ..

بس لو اليوجا في جملة .. فهي شئ يستحق التجربة..

شفافية البلور



"يوجد معلمون مزيفون واساتذة مزيفون فى هذا العالم .. اكثر عددا من النجوم فى الكون المرئى.
فلا تخلط بين الاشخاص الانانين الذين يعملون بدافع السلطة وبين المعلمين الحقيقين ..
فالمعلم الروحى الصادق لايوجه انتباهك اليه ولايتوقع طاعة مطلقة او اعجاباً تاماً منك ..
بل يساعدك على ان تقدر نفسك الداخلية وتحترمها..
ان المعلمين الحقيقين شفافون كالبلور يعبر نور الله من خلالهم"
من كتاب قواعد العشق الأربعون

هكذا هي
معلمة حقيقية.. روحية.. صادقة.. دافئة.. متالقة.. مثالية.. وشفافة كالبلور
ا/هناء
مدرسة الفلسفة .. المعلمة .. الفيلسوفة.. الصديقة.. علاقة ال 13 عام

كان لقائنا كعادتة مميز .. وكان اهدائها لي ايضا كعادته مميز..
اهداء من من تمثل لي القواعد والاستثناءات .. الحب بحد العشق.. من امرأة في الاربعون من عمرها
كان الإهداء هو كتاب "قواعد                               العشق                 الأربعون"

قواعد العشق الأربعون (رواية عن جلال الدين الرومي) تاليف إليف شافاق وترجمة خالد الجبيلي
اعترف انه يكيفي ان يكون الكتاب "منها" ليكون مميز في نظري ..
ولكن بريق الرواية لا يمكنني من ان انكر كيف كانت الرواية مميز في حد ذاتها :)


عن قواعد العشق الأربعون أتحدث:

الحقيقي اني لا احب قراءة الروايات .. ونادرا ما افعل .. ولا اقتنع ان الروايات تعطي ثقافة حقيقة بالمقارنة بالكتب ..
وحتي بعد قرائتي لاي رواية فانا لا اشعر بأن هذا النوع من القراءة هو المفضل بالنسبة لي ..

الاستثناء الوحيد لي كانت رواية "عزازيل" ليوسف زيدان ..
أسرتني "عزازيل" لدرجة اني قراث الرواية كاملة في يوم واحد..
لم تكن "عزازيل" خيارا لي .. بل كانت قدرا .. فقد كانت اهداء لي ايضا!!
وعلي الرغم من ان عزازيل كانت اهداء لي فاعتقد اني اكتر واحده اشتريتها برضو!!
فقد اهديت انا رواية "عزازيل" 6 مرات تقريبا ..
وتابعت كتابات يوسف زيدان بعدها بحثا عن عزازيل اخري بين السطور ولكني لم اجدها..
فكففت البحث لاني مللت كتابات الرجل ولا اعرف لماذا؟ّ!
ربما سقف توقعاتي في كتاباتة مقارنة بعزازيل!!
وربما الامر متعلق باني لا احسن اختيار الروايات مثلما احسن اختيار الكتب !!

اعتقد ان العيب الحقيقي كان هو خياراتي..
ف " قواعد العشق الأربعون" غيرت رائي السابق..
حقيقي انا الأن علي استعاد ان اقراء اي رواية.. بشرط
ان تكون علي مستوي الهام "عزازيل" او "قواعد العشق الأربعون"

في البداية لا استطيع ان انكر ان الكاتبة لم توفق في اختيار اسم الرواية من واجهة نظري
رغم اعجاب المعجبون بالرواية .. فأسم الرواية لاول وهلة لم يجذبني مطلقا رغم تزكيتهم لها .. بل العكس هو ما حدث لي!!
فكيف يمكن ان يكون للعشق قواعد؟! وكيف يمكن ان نقيد هذه القواعد بالاربعون؟!  
اما بعد اهداء ا/هناء .. فقررت قرائتها..

قواعد العشق الاربعون رواية ملهمة تحكي عن الصوفية بشكلا ما..
ربما اختلفت في مواقع متعددة مع اراء وتطبيقات ابطالها اختلاف كلي وجزري ..
لكن الرواية اسرتني وأثرت في.. 
تركتني الرواية في حالة فريدة..
كان اصدقائي وانا اقراء الرواية يعلقون علي نبرة صوتي ..
اعرف هده النبره انا .. نبرة فتاة في قصة حب ..
وقد كنت في قصة حب مع العشق في حد ذاته!!
فالرواية بكل المقايس حالة في حد ذاتها..

فكرت ان اكتب مقتطفات من الرواية هنا..
ولكني شعرت ان المقتطفات قد تمثل الرواية في حد ذاتها!!
فقررت ان يكون البوست نفسه ..دعوة للقراءة.

انا بكتب!!




البلوج ...

 يااااه .. 
بقالي كتير اوووي مكتبتش فيها حاجه..
2012 و 2013 كلها ..

مش دا المحزن ..
بس المحزن حقيقي اني مكتنش بكتب اصلا ..
ولا حتي في ال note book  بتاعي ..
لدرجة اني جديا افتقدتني انا !!

2012 و2013 كانوا زحمة اوووي .. 
زحمة احدات .. وزحمة مشاعر ..
الحقيقة اني كنت مشغولة  .. حتي عن الكتابة ..
 وعشان كدا مكتبتش اي حاجة..
رغم اني فعلا شايفة ان دا مش عذر!!

وانا بقلب في صفحات البلوج وفي صفحات ال note book  ..
 كنت جديا متيقنه اني خسرت كتير اوووي اني مكنتش بكتب لسنتين!

الكتابة دي بجد نعمة كبيرة اوووي ..
بالذات لما تلاقي حاجة قديمة كدا كنت كاتبها زمان..
حاجة تفكرك
       بفكره ازاي تطورت جواك ..
       باحساس قديم لشخص مشي او لسه موجود ..
       بحنين لمكان دافي بذكرياته ..
       او بهدف نسيته مع مرور ايام ..
       او بخاطرة .. محاضرة .. او حتي اغنية..

الكتابة بالنسبه لي رائعة ومبدعة..
       حاجه تخليك تلاقي نفسك ..
        تلاقي كلماتك واهتماماتك..
        وتفرح بسطور ابداعك وانجازك..

ل 2014 ..
انا هكتب ان شاء الله..
انا بكتب..
ودي هتبقي من اجمل الحاجات اللي حصلت فيكي ..
                    او من الحاجات اللي هتحليكي..