Puzzle 1,000 🧩

هبدا من وانا صغيرة :كنت صعب اشوف لوحة وتعجبني .. مش عارفة ليه بصراحة !! 😏
كان احيانا بيكون في تابلوهات الناس مبهورة بيها وانا ابقي اصلا مش شيفاها حلوة 😕.. ومش عارفة هي ليه حلوة من وجهة نظرهم!!
تابلوهات غالية جدا .. وبتتباع في مزادات ..وبرضو مبتعجبنيش .. ومببقاش عارفة ليه الناس تدفع فيها كل المبالغ دي😲!!

روحت كذا معرض فني عشان انمي احساسي بالجمال 👼
وبرضو مفيش ولا لوحة عجبتني وحسيت معاها الله نفسي ابص علي اللوحة دي كل يوم
او وقفت قدام معني في لوحة وحسيت اني نفسي اشوفه كل يوم ويالا اشتريها بقي
لما اتجوزت قرررت اني مش هعلق ولا لوحة في بيتي الا لما تعجبني لو تلمسني
وكنت بروح محلات بتنبع تبلوهات .. و ولا مره حاجة عجبني تابلو او لوحة لدرجة اني اشتريها 😅
قعدت 6 سنين معلقتش ولا لوحة في البيت😒

نيجي لل puzzle بقي 🧩
لما شوفت ال puzzle دا شكلة عجبني وتفاصيلة عجبتني ..
كنت مشترياه مش علي انه لوحة .. لكن لعبة وتحدي عايزه اجربه💪
اتقالي فكرة اني لما اخلصه اعلقه .. وعجبتني الفكرة 💭.. حسيت انه هيبقي حاجة عملاها بايدي كدا ..

ال puzzle كان 1000 قطعة
لما فتحته اتخضيت 😲 من اد ايه القطع صغيرة
ولما فردته كان مالي طربيزة السفرة كلها
وكنت مستصعباه جدا
ولما قريت فهمت اني ال puzzles مستويات
وفي معايير مهم تاخدها في حسابك وانت بتجيب puzzle لاول مرة
واتخضيت شوية وقولت دا نخلصه علي اخر 2020 باذن الله كدا😅

لما بدات فيه اندمجت جدا
وكنت بفصل معاه .. ومبحسش بالوقت فعلا 🕘
ودا شي عظيم .. عشان انا واحدة دماغها مبتفصلش اصلا .. وبفكر وانا نايمة كمان😂

مع بداية ال puzzle اندمجت جدا
وطبعا من السهل تبدا ال puzzle بترتيب الاطار الخارجي 🖽
عشان القطع اللي بترتب الاطار "Corner Pieces" بتبقي ليها معلم مميز .. انها مستقيمة "sharp"من ضلع فيها علي الاقل

انا ربطت دا عندي بمفهوم الحدود 🖽 بشكل عام مش بس في ال puzzle لكن كمان في العلاقات كلها
وان ديما اي حدود في العلاقات مهم تكون واضحة وصريحة ومعلنة ومش مايعة كدا
وان دا صحي وبيفرق في جودة العلاقات واحساسك جوه العلاقة كمان 👌
 

كذا حد لما شاف ال puzzle مفرود علي السفرة قالي ايه دا؟ّ .. ليه بتعملي يا بنتي في نفسك كدا؟
وهنا احب اقول حاجة مهمة
ان اللي انت شايفة 👀 ساحلة وحاجة سخيفة ممكن يكون حلو وممتع لغيرك
واللي انت شايفة ممتع وارد يكون مملل للاخر😎
بس احنا غالبا عندنا "تقوقع علي الذات" وبنشوف الامور من وجهة نظرنا احنا بس
بنشوف ان الممتع بالنسبة لنا لازم يكون ممتع للاخر .. والممل بالنسبة لنا لازم يكون ممل للاخر .. ودا فعلا موذي جدا
وقيس علي كدا "كل حاجة" في حياتنا .. ديما بنردها لاحساسنا احنا بيها ..
مع ان احنا مختلفين ودي حكمة ربنا واعجازة في خلق الانسان
 

للصراحة
البازل دا 999 قطعة مش 1000
عشان في قطعة ضاعت😡
القطعة دي انا عارفة هي ضاعت امتي وازاي
والقطعة دي انا ادركت انها مفقودة من نص البازل تقريبا
عشان هي برضو من القطع المميزة
عملت مجهود كبير عشان الاقيها وفشلت😓
وبعدين قبلت فقدها 💙 >> ودا مكنش سهل ابدا >> عشان انا مش بقبل الفقد بسهولة "ديما تفاصيل شخصيتنا بتبان حتي واحنا بنهزر او بنلعب علي فكرة"
ورغم قبولي لفقدها .. كنت بتمني جدا اني الاقيها
 

المشكلة بقي مكنتش بس في القطعة المفقودة
اد ما كانت بعد كدا في كل قطعة انا بلاقيها بصعوبة كنت قبل ما بلاقيها بتوقع انها ممكن هي كمان تكون قطعة مفقودة >> دا زود احساس الترقب شوية .. بس برضو زود احساس السعادة لكل قطعة بتتحط في مكانها بعد كدا👌
ديما انا مصدقة ان احيانا كتير الحاجات المفقودة زي ما بتضيف احساس بالفقد .. بتضيف مشاعر حلوة ووعي مختلف بياخدنا لحته تانية كدا كان صعب نروحها لو مفتقدناش الحاجة دي💥
 

لما خلصت البازل كنت حاسة
وهوووووووووووا 💃💃💃💃💃💃💃💃💃 ومبسوطة جدا بيه
انا فضلت شغالة في البازل دا 3 شهور ونص ابتديت 13 مارس وخلصت 27يونيو
اعتقد اني اشتغلت عليه 70 ساعة تقريبا
خلصته يوم السبت 27 يونيو .. كان وقت الفجر .. وكانت لحظة ملهمه جدا ليا 🌄
 

وبعد ما ال puzzle خلص كان ناقص قطعة
بس القطعة الناقصة مكنتش مزعجة ليا
قبلت عدم وجودها
وحسيت دا جزء من تفاصيل رحلتي في تكوين ال puzzle نفسه
اكيد اتمني الاقيها .. ومتوقعة اني هفرح اووي لو لاقيتها
بس دالوقتي انا مش عايزه بديل ليها..
مش عايزه اعمل costumed piece واحطها مكانها وخلاص
حابه قبولي لشكلها كدا 💙
 

عارفة ان في ناس مش هتاخد بالها من القطعة الناقصة دي
لكن بمجرد ما يخدوا بالهم منها صعب يتجاهلوا غيابها بعد كدا 👻
ودا برضو ليه علاقة باننا اوقات بنبقي مش واخدين بالنا من عيب معين في نفسنا او في الاخر
بس
بمجرد ما ناخد بالنا بيبقي صعب جدا نتجاهل العيب دا
واحيانا بنركز معاه ونضخمه كمان👻
وديما بيكون الحل في التقبل .. وانك تحط العيب دا في حجمة وتقدر تشوف الجمال رغم النقص💙
عشان اصلا مفيش حاجة في الدنيا كاملة .. زي ما اغنية شرين بتقول كل حاجة ناقصة حاجة ..
ولان اوقات بيكون مفيش اصلا مجال لاصلاح دا .. ولتقبل لتمشي مفيش حلول اخري ..
يعني Take it or leave it
 

انا حابه ال puzzle
حابه تفاصيل الرسمة والالون
حبه الافيال .. اصدقاء الرحلة والكفاح
واخيرا بقي عندي لوحة مستعده اعلقها في بيتي 💃
 

رغم انها ناقصة قطعة .. لكن هي فيها حكايات وحوارات ومزيكا وتفاصيل كتير انا مبسوطة بيها
واصلا بقي الجمال نسبي .. واللي انت تشوفه ناقص ..وارد يكون عند غيرك اللي مكنش يحلم بيه اصلا
 

حياتنا عاملة زي الpuzzle
كل خطوة بناخدها بتكمل الصورة
وبتضيف بعد وتفاصيل جديدة مكنتش عمرها هتتضاف من غيرها
المعافرة .. الشعب .. الاهتمام بالتفاصيل .. قبول الفقد .. الاحساس بالجمال >> دي معاني اتضاف لها تفاصيل جوايا في رحلتي مع الpuzzle 🧩 💙

سكر زيادة 🥄

في ٢٠٠٩ كنت بشتغل في شركة صاحبها امريكي اسمه كريس

كريس دا كان بالنسبه لي دماغ عالية كدا ومتكلفة 🧠

والمكان دا اكتر شغل انا "اتعلمت" فيه في حياتي

عشان في عالم الشغل مش سهل تلاقي مكان يعلمك اصلا!!

ودا كان بفضل سياسات كريس في الادارة

ودا طبعا فرق لي كتير 😇

..

كريس كان مره في مصر

وعامل معايا انا ومديرتي اجتماع

بيناقشنا في الاكونت اللي احنا بنشتغل عليه

..

مديرتي كانت سيبالي المساحة ساعتها

وكانت سيباني انا اللي برد علي كل اسئلته

..

كل ما يسالني سوال تقني

"واسالته ديما كانت اسئلة اتهام كدا👨‍✈️ "

ارد عليه رد مقنع يسكته 🤓

اللي هو كله تحت السيطرة يا نجم 💪🏻

..

في اخر الميتنج قالي

ديما عندك اسباب كدا يا سالي؟! 😎

لسه فكراها بصوته والاكسنت بتاعته

ودي طبعا كان سؤال استنكاري هدفه يقولي

انتي شاطرة وعندك اسبابك وجاهزه بردودك وكدا💪🏻💪🏻

..

لما اعجب بشغلي

عمل معايا اجتماع لوحدي

وسالني ليه ما اخدتش الشهادة

"دي كانت شهادة بناخدها في تخصصنا كدا .. وهو مكنش بيرقي حد غير لما ياخد الشهادة دي"

قولتله حسه اني محتاجة اشتغل اكتر وبعدين اخدها .. لاني شايفة ان خبرتي هتخليني اجيب درجة افضل

قالي اليوم اللي هتنجحي فيه هتترقي فيه😉

..

"الشهادة دي كان النجاح فيها من ٧٥٪؜"

قالي ٧٥٪؜ بتنجح ١٠٠٪؜ بتنجح 😎

مش فارقة

متحطيش مجهود زيادة في حاجة مش فارقة 💡

...

الشهادة دي في وقتها مكنتش سهلة

ومكنش سهل الناس تنجح فيها من اول مره

بس انا نجحت واخدت الشهادة دي "بمجهودي" ومن اول مرة 💪🏻

وجبت درجة اعلي من اللي كرس نفسه جابها 🚀

..

بس بعد مرور اكتر من 10 سنين

ادركت اني مفهمتش!!!!

وكنت فرحانه بال Score زي العبيطة 🙃

يالهووووي

متحطيش مجهود زيادة في حاجة مش فارقة 

تبدو سهلة

بس بجد هي ابدا مش سهلة

دي فلسفة يا نجم
!!

..

بعد 10 سنين ادركت ان

الجرعة هي الصنعة ⚖️

ومش سهل ابدا نظبط الجرعة

وان معلقة🥄 سكر زيادة .. مش بتسكر >> بتجزع النفس

..

وادركت ان ال 💯% ديما دي مرض !!

وان كتير بيبقي مش مهم 💯%اصلا ..

..

انا دالوقتي بحاول اعود نفسي اقبل النقص

اقبل ال%99 واقدر مجهود ال 9% كمان

عشان في مجهود مبذول يحب ان يحترم

..

وعشان اصلا ساعات قبول النقص بيبقي هو الحكمة

وساعات الحته الناقصة بتكون اكتر حاجة بتلفت النظر وبتميز اللوحة

!!!!

غير قابل للتوقع

 

كان في قاعدة درستها في القانون بتقول

"لا يجوز الاعتذار بجهل القانون"

👮🏻👮👮

يعني مثلا مينفعش اكسر السرعة المصرح بيها قانونا ..

🤷🏻‍♀️ واعتذر بإني مكنتش اعرف

حتي لو انا معرفش .. 

يطبق عليا القانون والعقوبة

 ☠️☠️☠️

لما درست القاعدة دي

كنت حاسه ان دا قمة العدل الانساني

⚖

عشان الدوله عمرها ما هتقدر تحدد اذا كان المواطن فعلا عارف القانون وله لا وبيستهبل

فالقانون ساري عليه سوء علم او لم يعلم

👌👌👌

..

عند ربنا بقي اعتقد مفيش الكلام دا

عشان ربنا هو اعلم بالسر وما اخفي

وهو برضو الرحمن ..والعدل

كل واحد حسابه شخصي جدا ..

..

حساب ربنا غير قابل للتوقع من وجهه نظري

وموازين ربنا فوق ادراك ومنطق البشر

 ..

يعني في حديث عن واحدة اتعذبت في قطة

🐱🐱🐱

وارد ناس كتير تشوف تصرفها دا تصرف بسيط مش مستاهل يعني تتعذب عليه

عن عبد الله بن عمر رضي الله عنهما أن رسول الله - صلى الله عليه وسلم - قال :  ( عُذّبت امرأة في هرّة 🐱، سجنتها حتى ماتت ، فدخلت فيها النار ؛ لا هي أطعمتها ، ولا سقتها إذ حبستها ، ولا هي تركتها تأكل من خشاش الأرض ) متفق عليه.

...

وفي حديث عن واحد دخل الجنة بسبب كلب

🐶🐶🐶

 وارد ناس كتير تشوف تصرفه دا تصرف بسيط مش مستاهل يعني دخول الجنة عليه

في الصحيحين عن أبي هريرة عن النبي صلى الله عليه وسلم: أن رجلا رأى كلبا يأكل الثرى من العطش، فأخذ الرجل خفه، فجعل يغرف له به حتى أرواه، فشكر الله له فأدخله الجنة

...

   وطبعا كلنا عارفين قصه قاتل ال100

  🏴‍☠️

 اللي لو كان مات في عصرنا دا 

كانوا الناس نصبوا نفسهم اله وحكام وحكموا عليه بالخلد في النار

😡😡

 

والقصة رواها الإمام مسلم في صحيحه عن أبي سعيد الخدري رضي الله عنه أن رسول الله صلى الله عليه وسلم قال : كان فيمن كان قبلكم رجل قتل تسعة وتسعين نفسا ، فسأل عن أعلم أهل الأرض ، فدُلَّ على راهب ، فأتاه فقال : إنه قتل تسعة وتسعين نفسا ، فهل له من توبة ، فقال : لا ، فقتله فكمل به مائة ، ثم سأل عن أعلم أهل الأرض ، فدُلَّ على رجل عالم ، فقال : إنه قتل مائة نفس ، فهل له من توبة،  فقال : نعم ، ومن يحول بينه وبين التوبة ، انطلق إلى أرض كذا وكذا ، فإن بها أناسا يعبدون الله ، فاعبد الله معهم ، ولا ترجع إلى أرضك ، فإنها أرض سوء ، فانطلق حتى إذا نصَفَ الطريق أتاه الموت ، فاختصمت فيه ملائكة الرحمة وملائكة العذاب ، فقالت ملائكة الرحمة : جاء تائبا مقبلا بقلبه إلى الله ، وقالت ملائكة العذاب : إنه لم يعمل خيرا قط ، فأتاهم ملَكٌ في صورة آدمي ، فجعلوه بينهم ، فقال : قيسوا ما بين الأرضين ، فإلى أيتهما كان أدنى فهو له ، فقاسوه فوجدوه أدنى إلى الأرض التي أراد ، فقبضته ملائكة الرحمة . قال قتادة : فقال الحسن : ذُكِرَ لنا أنه لما أتاه الموت نأى بصدره

 ....

الخلاصة

مينفعش اعين نفسي إله

واحكم علي الناس

مين هيدخل جنه
ومين هيدخل النار

مينفعش اقول مين يجوز عليه رحمه

ومين ميجوزش عليه رحمه

ومهم اراقب نفسي 

ولو لاقتني بعمل دا
.. اوقف نفسي عنه

والاولي

اني احسن لنفسي 

ومعملش دا مع نفسي

 لا في الحلو 

  أَفَأَمِنُوا مَكْرَ اللَّهِ فَلَا يَأْمَنُ مَكْرَ اللَّهِ إِلَّا الْقَوْمُ الْخَاسِرُونَ
{الأعراف:99}.

والا في الوحش

 إِنَّهُ لَا يَيْأَسُ مِن رَّوْحِ اللَّهِ إِلَّا الْقَوْمُ الْكَافِرُونَ
 {يوسف:87}

كل اللي عليا هو السعي 

‏وَأَن لَّيْسَ لِلإنسَانِ إلاَّ مَا سَعَى‏
 {النجم:39}

عشان

حساب ربنا غير قابل للتوقع من وجهه نظري

وموازين ربنا فوق ادراك ومنطق البشر

 ..

فرق توقيت

دالوفتي فاهمة اكتر

ان

 دقيقة ناقصة

او زيادة

ممكن

 تقتل شغف

تقتل بريق

تقتل معافرة

تقتل محاولة

ان دقيقة واحدة

وموقف واحد

ممكن يغير

افكارنا

مشاعرنا

رصيد العلاقة كله

ان دقيقة واحدة تعمل

فرق في توقيت

فرق في المسافة

فرق في الفهم

فرق في التقدير

فرق في الخطوة

فرق في التجربة

فرق في التقبل

 وان ساعات

بتبقي كلها بايدك وفي ايدك

وساعات تانية بيبقي

ليس لك من الامر شئ

هرم الفستان الأبيض

في مصر الهرم الاجتماعي هو
 "هرم الفستان الأبيض" 

ودا لان الفستان الأبيض هو المعيار الاول فيه


والهرم الاجتماعي كالتالي


1- الارامل

تأتي علي قمة الهرم طبعا 
ومش اي واحدة مات جوازها في الطبقة دي

لازم يكون
ساب لها عيل/عيال  تربيهم
 وهي ضحت من اجلهم ومتجوزتش
 ومتجوزتش بعده وفاءه له

ليه هما في قمة الهرم الاجتماعي؟
عشان هما تحرروا من قيود العلاقة الزوجية
 بس بشكل اجتماعي مقبول
الراجل مات ياعيني وهما لا حول لهم ولا قوه
 !!

 قاعدة بتربي عيلها .. وشايلة المسئولية لوحدها
 وبعيدا عن ان في ستات مطلقات او متجوزين ورجلتهم شايلة ايدها من حوار العيال والتربية دا
لكن برضو مفيش مقارنة بين دي ودي
ليه؟
عشان المطلقة دي هي الغلطانة "هنتكلم علي الحته دي كمان شوية"
والست المتجوز دي في راجل في حياتها
هتقولي ما انتي لسه قايلة انه شايل ايده  
هقولك الله .. ظل راجل ولا ظل حيطة

 متجوزتش بعده وفاءه له
..
سيبك بقي من انها
 ممكن تكون قرفت من الجواز اصلا .. ولما صدقت تاخد نفسها
او تكون اصلا محبتش جوازها المتوفي دا اصلا
كان جوازه وخلاص
 ممكن تكون اصلا كانت عايزه تتجوز .. بس مجلهاش فرصة
لكن برضو
  هي متجوزتش بعده وفاءه له
!!!!!!!


2- المتجوزين
تيجي في الطبقة اللي بعد الارامل علطول في الهرم
ومش اي متجوزه برضو لازم تكون دي الجوازه الاولي ليها 
سيبك بقي هي بتحب جوزها او لا .. او حتي في احترام بينهم او لا .. مش قضيتنا!!
جوزها بيخونها .. مش بيرجعلها في الاخر .. لازم تستحمل  ..وتصبر عليه .. عشان اولادها
جوزها مش مسئول وكله علي دماغها .. ظل راجل ولا ظل حيطة ..لازم تستحمل  ..وتصبر عليه .. عشان اولادها
مفيش توافق نفسي بينها وبينه .. لا انتي كدا اسبابك سيس بقي وانا مش هرد عليكي .. توافق نفسي ايه وزفت ايه .. امال اتجوزته ليه من الاول ؟!
كان في ضغط اجتماعي عليها مثل .. او مكنتش راشدة كفاية .. او حتي افكارهم وارائهم في الحياة اختلفت كتير بعد الجواز .. دي مش مشكلتنا .. برضو لازم تستحمل .. ولازم تصبر عليه .. عشان اولادها
كل الاسباب دي واكتر منها .. لا تفرق مع المجتمع المصري في حاجة
ما دام انتي متجوازه فانتي"ما شاء الله" في المرتبة الاجتماعية التانية
!!!!!!!!

وبكدا خلاص الهرم خلص


هنقول طب فين
 الارامل اللي معندهمش اولاد
 المتجوزين للمره التانية
المطلقات
اللي لسه متجوزوش

احب اقول لكم
 دول مش في الهرم عندنا اصل
دول تحت الخط الاجتماعي
 في تدرج ليهم طبعا 
بس لا ينتموا للهرم الاجتماعي


ترتيب كما يلي


سالب 1-  الارامل اللي معندهمش اولاد  ومتجوزوش تاني

دول فئة المعقدين 
اللي فاهمة الحياة غلط 
 ومش فاهمة فين مصلحتها
يا ستي هي بتحبة ومش قادره تتخيل نفسها مع حد تاني
يعني تفضل كدا بطولها وتموت لوحدها
 الحياه مبتقفش علي حد
يا ستي هي بتحبه والحياه عندها واقفة عليه 
مهي مش فاهمة فين مصلحتها .. فاهمة الحياة غلط
!!!!!!!!!!!


سالب 2- المتجوزين اكتر من مرة
بعيدا بقي عن هي ارملة وله مطلقة 
فهي هيفضل تعرفها .. مرأه فلان ودي جوازتها التانية او الثالثة 
ولازم نفضل نعد عليها 
ونتريق عليها لو دوبتهم اتنين
وهتفضل قصتها الاولي متضمنة في التعريف .. سواء كان ليها لازمة او ملهاش
والغالب طبعا انها ملهاش .. بس هو كدا

والارملة دي اصلا تتجوز ليه؟ .. بالذات لو عندها اولاد
حقها في الجواز هنا المجتمع بيستنكره ويكاد يسقطه عنها
وكانها اجرمت
الله !!  مش كانت قاعدت تربي ولادها
ازاي تدخل عليهم راجل غريب يعني
دا ولادها علي وش جواز
وحاجات تانية كتير
!!!!!!!!!!


سالب 3 - المطلقات
 دي هي الغلطانة
اي ست المفروض تحرص منها وتخاف علي جوزها
 لانها ممكن تلعب عليه باي شكل وباي طريقة
او
 دي واحده فاشلة 
ومعرفتش تمشي امورها 
حتي لو كان طليقها دا فيه العبر
 وحتي لو قايمة بدورها .. وشايلة مسئولية ولادها .. وبتربيهم علي اكمل وجه
!!!!!!!!!!


نيجي ل الأنسات بقي 
ودول فئتين
وبرضو خارج الهرم


اعلاهم
اللي تحت ال 19
او بالاصح من صفر ل 19
والكلمة  الرسمية ليهم .. عقبال من نفرح بيكي بالفستان الابيض
من ساعة ما اتولدت ولحد  الجامعة
وفي كل مناسبة في حياتها .. نجحت او حتي عيد ميلادها
 لازم يتقال لها 
عقبال ما نشوفك عروسة
!!!!!!!


ثم 
اللي عدي ال 20  يا نهار ابيض
دول عنسوا خلاص
وفي كل مناسبة لازم يتقالهم مليون كلمة كدا من تحت الحزام
 عشان هما عندهم نقص ما ولازم يكملوا 
 بعيدا عن اي انجاز في حياتها مهما كان

ويستخدم معاهم استراتيجية الزن علي الودان بالسؤال الدائم
ها شدي حيلك .. فرحيني بيكي
ما تشوفي نفسك كدا .. دا اللي اصغر منك اتجوزا

وكأننا في مجتمع البنت فيه عادي انها تاخد الخطوة وتروح تتقدم للولد مثلا
او تتطلب منه الجواز علي مسمع الجميع
!!!!!!


دي نظرة الغالبية وطبعا في استثناءات
لكن حقيقي ان المجتمع المصري بينظر للمرأة من دورها مع الراجل "الزوج" بس 
وبيتجاهل اي انجاز تاني لها في حياتها
حتي لو كان الانجاز دا في الدور الرئيسي من وجهة نظره واللي هو تربية الاولاد
!!!!!!!!!

فالست المتجوزة الفاشلة مع جوزها وفي تربية اولادها
افضل من
المطلقة اللي ولادها متالقين ونفسيتهم سوية .. ودا طبعا دور ومجهود جبار
 لكن
ستظل المتجوزة في نظر العموم مدام فلان و المطلقة طليقة فلان

لقد هرمنا من هذا الهرم


شابوه

شابوه
لكل ست او بنت مصرية
عارفه تعيش حياتها صح
..
عارفة تاخد حقها
وتعمل اللي عليها
..
وبتعمل اللي هي مقتنعه بيه
بعيدا عن رأي المجتمع وكلام الناس

شابوه
انتي متالقة
متالقة.. مهما قالوا او عادو

شابوه
لان الحقيقي اوي 
ان
انتي الهرم
:)

وهم الكتب الأكثر مبيعا

العادي ان رف الكتب الاكتر مبيعا بيبقي في ابرز موقع في اي مكتبة..

 في الفاترينة لو في ..  في المدخل  ..  عند الكاشير

ورغم كدا الرف دا عمره ما كان ملفت بالنسبة لي ..

ديما عندي قناعة ان مش عشان الكتاب موجود في الرف دا يبقي كتاب مميز او العكس..

في الغالب

 بسأل الناس اللي بقتنع بذوقها في الفراءة .. 

او بيبقي في موضوع جاذبني فبشوف الكتب اللي عليه..

.............................................................

من الكتب الاكثر مبيعا اللي قرائتها

رواية الفيل الأزرق لاحمد مراد

كذا حد من اصحابي قالي فيها شعر

وان النهاية حكاية..

 محمد جوزي برضو قالي ان الكتاب حلو ونهاية غير متوقعة ..

انا بقي طول ما انا بقرأ الكتاب مستنية الحته الحلوة

وقاعدة اصبر نفسي واقول اكيد زمانها جاية   

لحد ما وصلت للفصل الاخير .. وقولت هي هنا ..ايوه  النهاية اللي بيقولوا انها غير

وخلصت الرواية الحمد لله .. 

وابدا مستمتعتش بيها!!

تحس كدا انك قاعد في خمارة طول الرواية ..
 ومش دي القصة

الوصف والروابط تحس ان فيها حاجة غلط كدا.. 

اسلوبة مبالغ فيه .. بالنسبالي بصراحة..

ورغم كدا دخلت الفيلم لما نزل ..

كان بالنسبة لي اول رواية اقرائها الاول وبعد كدا ينزل منها الفيلم .. مش العكس

فكنت عايزه اعيش الجو

كنت قريت الرواية من فتره طويلة .. ومكنتش فاكرها بالنص يعني

الفيلم طبعا احسن بكتير من الرواية .. القصة متحرفه شوية .. 

والفيلم مصروف عليه .. متصور حلو .. الصوت والموسيقي برضو حلوين اوووي

بس برضو ممل .. في حته واقعة .. في روابط مش مظبوطة .. تحسه صعب يتصدق .. بيفصل كدا!!

.............................

من الكتب الاكتر مبيعا برضو اللي قراتها

رواية ربع جرام لعصام يوسف

الرواية من 2008 .. بس انا قراتها الشهر دا

بجد تحفة ..

ورغم ان الرواية كبيرة .. بس انا خلصتها في 3 ايام من كتر ما كنت مشدوده لها..

ورغم انها بتتكلم عن المخدرات وانواع كتير منها .. لكنها رواية فعلا محترمة

قعدت كتير عقبال ما فهمت ايه اهمية الليمون في حوار البوادرة والضرب؟!
 بس الحمد لله اخيرا وصلت

الرواية بتفهمك حاجات كتير صعب اووي تفهمها وانت بره الصورة .. صعب تحسها بالشكل دا

..

لما خلصت الرواية كان عندي احساسين

الاول اني عايزه اولادي يقروها ..اما يبقي عندي اولاد اصلا..

التاني اني عايزة  احضر لقاء لصلاح بطل الرواية .. 
ويقعد يتكلم كدا وكلنا نعقد نصقف له جاااااااااامد بقي .. والجو دا..

لما عصام يوسف في اخر الرواية قعد يقول اننا لازم نحترم خصوصية ابطال الرواية
كنت حاسة انها جت في الوقت الصح .. 

........................................

الكتب الاكتر مبيعا .. بالنسبة لي وهم .. واسلوب تسويقيي .. ينجح للاسف مع كثيرون!!