३ شوال

عيد سعيد علينا كلنا يارب
وكل سنه واحنا طائعين
وكل سنه واحنا في حال اروع من اللي قبله

عارفين من اجمل الحاجات اللي بتحصل للواحد
انه يحس انه فرحان لمجرد ان العيد جه
وله يشوف الابتسامة في صلاه العيد علي وش كل اللي حواليه
وله السؤال البري بتاع مين اول واحد عيد عليك

مين اول واحد عيد عليك؟!
طبعا مش بكرر السوال عشان ارد عليه
بس عايزه اعيد علي حد علي صفحات مدونتي في العيد
وعشان اعيد عليه باسلوبي فانا فكرت اهدي له خاطره جاتلي في رمضان

الخاطره عن اية من اكتر الايات اللي بحبها ويمكن ديما ببتسم لما اسمعها
هي الايه 23 في سورة النساء الايه دي بتقول
"حُرِّمَتْ عَلَيْكُمْ أُمَّهَاتُكُمْ وَبَنَاتُكُمْ وَأَخَوَاتُكُمْ وَعَمَّاتُكُمْ وَخَالاَتُكُمْ وَبَنَاتُ الأَخِ وَبَنَاتُ الأُخْتِ وَأُمَّهَاتُكُمُ اللاَّتِي أَرْضَعْنَكُمْ وَأَخَوَاتُكُم مِّنَ الرَّضَاعَةِ وَأُمَّهَاتُ نِسَآئِكُمْ وَرَبَائِبُكُمُ اللاَّتِي فِي حُجُورِكُم مِّن نِّسَآئِكُمُ اللاَّتِي دَخَلْتُم بِهِنَّ فَإِن لَّمْ تَكُونُواْ دَخَلْتُم بِهِنَّ فَلاَ جُنَاحَ عَلَيْكُمْ وَحَلاَئِلُ أَبْنَائِكُمُ الَّذِينَ مِنْ أَصْلاَبِكُمْ وَأَن تَجْمَعُواْ بَيْنَ الأُخْتَيْن إلا ما قد سلف إن الله كان غفورا رحيما"ِ

يعني الايه ايه تحريم
_واول كلمه فيها حرمت عليكم_
ربنا فيها بيحرم علينا علاقات بعينها
لكني لازم نشوف في جوهرها العطاء مذهل

تخيلوا كدا معايا لو ان ينفع
الابن يتزوج من امه
الاب يتزوج من ابنته
الاخ يتزوج من اخته
الرجل يتزوج من عمته او خالته
العم يتزوج من ابته اخوه
الخال يتزوج من ابنة اخته
الرجل يتزوج من امه من الرضاعه
الرجل يتزوج من حماته او امرأة ابنه
الرجل يتزوج من بنت مرآته "اللي من رجل غيره"
او ان اختين يتزوجوا نفس الرجل او المرأة وعمتها اوالمرأة وخالتها.

تخيلتوا
دا بجد يبقي العلاقات بينا كانت خربت

تخيلوا مثلا بابا بيغير علي ماما من اخويا اصلهم بيحبوا بعض
وماما بتغير علي بابا من اختي اصلهم بيحبوا بعض برضو
!!!!!!!!!!

وله تخيلوا اخويا وصل البيت فانا بقي بجري البس الحجاب
اصل بقي الاخ ممكن يفتن في اخته وله حاجه
لا لا بجد دي كانت تبقي اوفر اووووووووي

وله انا واختي مجوزين نفس الشخص
وبنكيد لبعض عشانه بقي
!!!!!!!!!!!!!!!!
لا انا بحب اختي
مكنتش واللهي يابنتي هعمل كدا حتي لو حلال

وله مثلا قاعده انا وجوزي وامي
وانا وماما مش حبين بعض عشان انا خايفه علي جوزي منها
..
وله قاعده انا وحمايا وجوزي
وجوزي مش طايق باباه خايف عليا بقي
ياساتر يارب
!!!!!!!!!

لا لا بجد تخيلوها فعلا
اهوا كدا علاقتي بالبيت بس اللي انا في خربت
ودول المفروض اقرب الناس لقلبي
طب عمموا بقي القصة ع المجتمع كله
المجتمع بجد كان خرب
سبحانه

الحمد لله
الحمد لله الذي قال فيه ابن عطاء
ما منعك الا ليعطيك

ما اروع المنع في هذه الآية الذي أعطانا الله به تراحمنا مع كل أرحامنا
ربما كانت الاية من اروع الأصول لصله ارحامنا
وكانت سر من اسرار حبنا لهم وودنا اليهم

نعم منع الله
ولكن العطاء اكبر والمنع أفضل وأقوم وأخير
سبحان الله وبحمده .. سبحان الله العظيم

الخاطرة دي كتبتها عشان تكون عديتي لبابا في العيد
كتبتها وأردت ان اجعل يوم العيد الذي توفي في أبي
لا يخلو من فرحه العيد فيأجر عني بذلك أبي
..
ولعله أيضا يأجر بدعوتكم له علي ظهر الغيب
رجائي ان تجعلوها علي ظهر الغيب منكم له

اللهما اغفر لآبائنا وأمهاتنا وأموات المسلمين جميعا واجمعهم بأهلهم علي خير
واجعل ولدهم خلف صالح لهم يدعو لهم .. امين

There was an error in this gadget