Interviews

مش غريب ان الواحد يجيله تاج عادي بتحصل
لكن الغريب ان حد يبعتلك تاج وأنت معندكش مدونة
ويقولك عادي اعمل بلوج وأبقي رد ع التاج
!!!!
هي ياسمين كدا ديما تعمل فيا حركات جامدة
شكرا ياياسو

التاج كان بيقول قول خمس حاجات محدش يعرفهم عنك؟
أنا هتكلم علي خمس مقابلات شخصية

الأول في المعهد البريطاني
IBI
عشان احدد المستوي اللي هبدا منه المفروض ادخل انترفيو
خلاص امتحنت تحريري وعرفت درجاتي وكنا خمس بنات

فالموظفة قالت لي أنتي بس اللي هتبدائي دالوقتي
فقولتلها ماشي لكن مكنتش واخده بالي أني هبدا مقابلة توقعت أني هبدا الكورس نفسه، دخلت المقابلة واللي كان بيمتحنني مبيتكلمش عربي أصلا
فقال لي what's your name?
أنا قاعدة ساكتة ومش واخده في بالي أني أرد أصلا

كنت مستغربه ومسترخمه أني أكون في القرص لوحدي
فالراجل قالي
Your name is sally, That is true?
فقولت له
Yes, my name is sally
الحمد لله أدركت انه بيسالني ومكنتش في الوقت دا أصلا اعرف ان في حاجه اسمها مقابلة شخصية أصلا .. اعطاني جريدة انجلزية وقالي أقرا وبعدين قالي انه هيتكلم وأنا عليا أقول نفس الكلام إلي هو بيقوله... وحدد المستوي وشكرني

وأنا قولت هاااه الحمد لله مش هاخد الكورس لوحدي

وأتعلمت من المقابلة دي ان الواحد لازم يبقي محضر للمقابلات الشخصية ويعرف مين اللي هيحاوره كمان

المقابلة الثانية
كانت بتدرب في بنك فدخلت اعمل مقابلة ضغننه كدا
بردك معرفش أنها مقابلة شخصية مش عارفه هما مستقصدني وله ايه !!!
المهم دخلت واتعملت بكل بساطة والراجل أصلا كان لذيذ جدا
فوجئت انه بيقولي هنكون سعدا انك تنضمنا في فترة تدريبك، قولت مع نفسي لا واللهي يعني دي كانت مقابلة بردو

أتعلمت من المقابلة دي ان الواحد يبقي تلقائي وميتجملش

المقابلة الثالثة
كانت في كورس واللي كان بيعمل معايا المقابلة كان عايش أوي عليا

وأنا بصراحة مبحبش الجو دا

كان هو كمان اللي عامل السمينار "العرض الافتتاحي يعني" وقال فيه قصة كان حكاها د/ إبراهيم الفقي فانا علقت عليها في الاستمارة اللي وزعوها علينا لأنهم كانوا طلبين تعليقاتنا

فأول سؤال من قبل مايقولي حتي عرفي نفسك بيقولي أنتي تعرفي د/إبراهيم الفقي منين؟ انا بصراحة فهمت قصده وقولتله د/ إبراهيم شخصية عامه وأنا قرات له وحضرت له ندوات قالي بلهجة مستفزه حضرتك كان عندك نقد ع الطريقة اللي عرضت بيها القصة؟ قولتله بصراحة أنا مقتنعة ان الإنسان لما ينقد حاجه بيبقي حابب يشوفها بصورة أحسن ودا كان قصدي من النقد اما عن النقد نفسه فقولتهوله تاني وفهمته قصدي

فقالي ممكن تعرفينا بنفسك؟
فابتسمت كدا اللي هو أنت لسه فاكر ورحت معرفاه بنفسي، طول المقابلة بقي قاعد يستفذني وأنا طبعا عادي برد في الحدود بتاعت المقابلة بس، في أخر المقابلة قالي ان شاء الله هنبقي نتصل بيكي، قولتله دا طبعا لأني نجحت في المقابلة راح مبتسم كدا وقالي اكيد، وأنا في اتجاه الباب راح قايل انسه سالي قولتله ايوه راح مسقفلي، بجد أنا فرحت بالحركة مووووت بس بردك فضلت مخنوقة منه

بس أتعلمت من المقابلة دي ان الواحد لازم يكون مش خايف وهو في المقابلة ويبقي فاهم القصد من السؤال وميردش إلا لو اقتنع بأهمية السؤال

أخر حاجه هقولها مش مقابله بس كلمتين مقتنعة بيها أوي

لا يمكن ان تتيح لك فرصة الانطباع الأول إلا مرة واحدة

الانطباع الأول يدوم طويلا